Vennskapskommunar
Førde har vennskapsavtale med La Crosse i Wisconsin, USA. La Crosse har ca 50.000 innbyggjarar. Dei er svært aktive i internasjonalt arbeid, og har i tillegg til Førde vennskapsbyar i Kina, Russland, Frankrike, Tyskland og Irland.
Mottoet for vennskapsarbeidet er vennskap og læring. Innafor dette mottoet vert det arbeidd med besøk mellom dei to byane, enten i form av grupper og delegasjonar, eller einskildpersonar som besøkjer den andre byen. Eit anna tiltak er yrkesutveksling. Dette skjer kvart år, begge vegar. 4 til 7 personar reiser til vennskapsbyane kvart år på yrkesutveksling.
I begge byane forsøkjer ein også å markere vennskapen på andre måtar: Som tema i skulen, temautstilling på bibliotek, og ikkje minst vert det spanande å sjå resultatet av den norske, Førdeavdelinga i La Crosse sin internasjonale hage. Dette er eit stort parkområde ved Missisippi, der fleire av dei andre vennskapsbyane har fått sine avdelingar.
Samarbeidet vert organisert av ein samarbeidskomite der Tom Farsund for tida er leiar.
Førde har også eit vennskapssamarbeid med Kent i Washington, USA. Dette samarbeidet er organisert saman med kommunane Naustdal, Jølster og Gaular. Også her er ulike former for utveksling viktige. Sidan sommaren 2007 har Kent og Indre Sunnfjord utveksla såkalt ungdomsambassadørar. Det vert også gjennomført gjensidige delegasjonsbesøk ein gang i kvar valperiode. Såleis fekk Kent besøk frå Sunnfjord både hausten 2006 og 2010, mens vi hadde siste besøk frå Kent sommaren 2008. Neste besøk ventar vi hausten 2012. Leiar av komiteen er for tida Erik Torp Nilssen.